悭家Lady 猎豹BB,如假包换的广州女生,曾在">奢侈品职场打滚,更流连于柴米油盐的生活,会赚钱理财,更爱花钱购物。
一班小朋友一起感受“开笔礼”中正衣冠、朱砂启痣、击鼓鸣志、启蒙描红、茶敬亲师五个步骤,比框框条条嘅教条式讲课更能亲身感受乜系中国传统文化,既好玩又有意思。
九月开学季,各大商场学生用品区墟冚到不得了,逼满前来选购嘅家长学生。如今个个都系金笸箩,家长买嘢都唔会孤寒,就算贵都会拣啲热门嘅电子学习产品,反观传统嘅“纸笔墨”就拍晒乌蝇冇人睺。
笔,曾几何时作为人类一大发明,喺以前嘅生活中无可替代,学习、交流、联络都要靠呢支小小嘅笔。古代为咗尊重“笔”,学童会行“开笔礼”,即开学第一日晨七咁早就要来到学堂,由启蒙老师讲授人生最基本、最简单嘅道理,参拜孔子像后先可入学读书,“开笔礼”当时作为人生四大礼之一,对以前嘅读书人来讲意义重大。不过来到而家呢个科技时代,睇电子书多过睇纸质书,打印多过写字,发短信多过写信,笔嘅书写功能似乎只净低碌卡签单又或者去饮茶划点心单等鸡毛蒜皮琐事上,以至于有时攞起支笔填个表格都要谂谂个字点写,真系揸笔忘字兼讽刺。
以前行“开笔礼”先要学造“人”,“人”虽然笔画简单但意义深远,意味人生启蒙阶段学会做人最重要;“人”字加一划成“大”,再添一划变“天”,“天”字出头为“夫”,小小笔画变化但意思变化万千。但而家嘅细路变晒“电脑新人类”,手机、iPad等各种电子产品细细个就玩得出神入化,反而写字就好似鬼画符咁,连自己个名都写唔好。以前学写字,先生时时强调“字如其人”,字体刚劲有力嘅人亦沉着刚毅;字体磊落洒脱,人如其字必不拘小节;其字清秀必多为文人雅士,而且作为旧时读书人,写字系人生第一门功课。考官有权将写字差嘅试卷作废,因写字样衰而考试肥佬真系确有其事;不过而家你睇到嘅都系打印出来规正嘅方块字,唔好话观字于人,连想象嘅空间都冇晒。偶然见到一西装骨骨成功人士写嘅字竟然岩岩儳儳,心入面唔止可惜其字破坏晒佢完美嘅形象,更怀疑佢嘅基础教育会唔会学得个半桶水?
如果有得买,我希望可以团购一个“开笔礼”。就算今时今日唔使读《四书五经》,就算唔使再去考科举做秀才,一班小朋友一起感受“开笔礼”中正衣冠、朱砂启痣、击鼓鸣志、启蒙描红、茶敬亲师五个步骤(指出门要懂得仪表端正、上学要好读书读好书、要做一个堂堂正正嘅学生、学会做人最为重要以及做人要有感恩之心),比框框条条嘅教条式讲课更能亲身感受乜系中国传统文化,既好玩又有意思。弘扬传统优秀文化唔系打下牙铰斋讲就得,点样可以俾食麦记、饮可乐、讲鸡肠、玩电脑大嘅中国孩子们接受优秀文化熏陶?行动最实际。希望呢啲团购快啲有人做!